முகப்பு சினிமா இன்று புதிதாய்ப் பிறந்தோம்!

இன்று புதிதாய்ப் பிறந்தோம்!

அன்பார்ந்த ஆனந்த விகடன் வாசகர்களுக்கு…

அச்சு இதழ் மூலமாக மீண்டும் உங்களைச் சந்திப்பதில் பெருமகிழ்ச்சி அடைகிறோம். உங்களைக் காணாமல் நாங்களும் எங்களைக் காணாமல் நீங்களும் தவித்த தவிப்புக்கும் ஏக்கத்துக்கும் முற்றுப்புள்ளி வைக்கப்பட்டுள்ளது. நூற்றாண்டை நோக்கிய ஆனந்த விகடன் பயணத்துக்கு என்றும் அடித்தளமாக இருப்பவர்கள் ஆனந்த விகடன் வாசகர்களே. உங்களின் தொடர்ச்சியான ஊக்கமும் வரவேற்புமே எங்களைத் தொடர்ந்து இயங்க வைக்கிறது.

94 ஆண்டுக்கால விகடனின் வரலாற்றில் எப்போதும் சந்தித்திராத புதிய அனுபவத்தைச் சந்தித்தோம். உலகையே அச்சுறுத்தும் கொரோனாப் பரவலைத் தடுக்கும்விதமாக நாம் அனைவரும் சமூக இடைவெளியைக் கடைப்பிடித்துவருகிறோம். கொரோனாத் தொற்றைத் தடுப்பதற்காக மத்திய, மாநில அரசுகள் அறிவித்த ஊரடங்கு உத்தரவால் வாசகர்கள் வெளியில் வந்து ஆனந்த விகடன் இதழை வாங்க முடியாத சூழல்; கடைகள் குறைவாகவே திறந்திருக்கும் நிலை; எங்கள் இதழ்களை உங்களிடம் கொண்டு சேர்க்கும் விநியோகஸ்தர்களின் உடல்நலம், பாதுகாப்பு ஆகியவற்றை முன்னிட்டு கடந்த மூன்று வாரங்களாக ஆனந்த விகடன் அச்சு இதழைக் கொண்டுவர முடியவில்லை.

ஆனாலும் விகடன் இணையதளத்திலும் விகடன் செயலியிலும் (ஆப்)ஆனந்த விகடன் இதழ்களைப் பதிவேற்றியிருந்தோம். லட்சக்கணக்கான வாசகர்கள் விகடன் இணையதளம் மூலமாகவும் விகடன் செயலியைப் பதிவிறக்கம் செய்தும் ஆனந்த விகடன் இதழ்களைப் படித்துவந்தார்கள். இந்த நெருக்கடியான சூழலில் எப்போதும்போல் தொடர்ந்து பேராதரவு வழங்கிய ஆனந்த விகடன் வாசகர்கள், அச்சு இதழைக் கொண்டுவர முடியாத சிறிய இடைவேளையைப் பொறுத்துக்கொண்ட ஆனந்த விகடன் முகவர்கள், கடைக்காரர்கள், விற்பனையாளர்கள், விளம்பரதாரர்கள், விநியோகஸ்தர்கள் அனைவருக்கும் நெஞ்சார்ந்த நன்றியைச் சமர்ப்பிக்கிறான் விகடன்.

‘அச்சு இதழைப் படிக்க வேண்டும்; புத்தக வாசனையோடு ஆனந்த விகடனின் சுவையான கட்டுரைகளை நுகர வேண்டும்’ என்ற வாசகர்களின் விருப்பத்தை நிறைவேற்றும்விதமாக, இதோ உங்கள் கைகளில் ஆனந்த விகடன் இதழ் தவழ்கிறது.

மே 3 வரை ஊரடங்கு தொடர்ந்தாலும் ‘ஏப்ரல் 20 முதல் சில அத்தியாவசியத் தொழில்களுக்கு அனுமதி’ என்று மத்திய, மாநில அரசுகள் முடிவெடுத்துள்ளன. வெளியில் சென்று இந்த அத்தியாவசியப் பணிகளில் ஈடுபடுபவர்களில் கணிசமான ஆனந்த விகடன் வாசகர்களும் இருப்பீர்கள். ‘நாம் இன்னும் முழுமையாக கொரோனா அபாயத்திலிருந்து மீளவில்லை’ என்ற எச்சரிக்கையுணர்வுடன் நீங்கள் இந்தத் தளர்வுக்காலத்தைப் பயன்படுத்திக்கொள்ள வேண்டும். யாருக்குத் தேவை இருக்கிறதோ, எந்தெந்தத் துறைகளைச் சேர்ந்தவர்களெல்லாம் வேலைக்குச் செல்லலாம் என்று அரசு அனுமதி கொடுத்திருக்கிறதோ, அந்தந்தத் துறைகளைச் சேர்ந்தவர்கள் மட்டும் முகக்கவசம், சானிட்டைசர், சமூக இடைவெளி ஆகிய பாதுகாப்பு முறைகளைக் கடைப்பிடித்துப் பணிபுரிய வேண்டியது அவசியம். மற்றவர்கள் வெளியில் செல்லாமல் வீட்டில் இருப்பதும், அவசரக் காரணங்களுக்காக வெளியில் செல்லும்போது தகுந்த பாதுகாப்பு முறைகளையும் சமூக இடைவெளியையும் கடைப்பிடிக்க வேண்டியதும் அவசியம். ஆனந்த விகடன் வாசகர்களாகிய உங்கள் உடல்நலமும் பாதுகாப்பும் எங்களுக்கு மிக மிக முக்கியம்.

கொரோனா வைரஸ் வெறுமனே நோய் குறித்த அச்சத்தை மட்டும் ஏற்படுத்தவில்லை. அடித்தட்டு மக்களின் வாழ்வாதாரம் குறித்த அச்சத்தையும் ஏற்படுத்தியுள்ளது. இந்த ஊரடங்கு காலத்தில் பாதிக்கப்பட்ட மக்களுக்கு உதவுவதற்காக ஆனந்த விகடன் சார்பில், வாசன் சாரிடபிள் டிரஸ்ட் மூலமாக நிவாரணப் பணிகளை மேற்கொள்ளவிருக்கிறோம். இதற்காக, வாசன் சாரிடபிள் டிரஸ்ட்டுக்கு ஆனந்த விகடன் பங்காக 10 லட்ச ரூபாய் ஒதுக்கப்படுகிறது. இந்த நிவாரணப் பணிகளுக்காக வாசகர்களும் நிதியுதவி அளிக்கலாம். மேலும், ஏப்ரல் மாதத்தில், வாசகர்கள் வாங்கும் விகடன் குழும இதழ்களின் சந்தா, ஆன்லைன் சந்தா, விளம்பரங்கள், பிரசுர புத்தகங்கள் உள்ளிட்டவை மூலம் கிடைக்கும் வருவாயில் 10 சதவிகிதத் தொகையும் இந்தச் சேவைக்கு வழங்கப்படும் என்று தெரிவித்துக்கொள்கிறோம்.

கொரோனாவுக்கு முன், கொரோனாவுக்குப் பின் என்று உலகம் மாறியிருக்கிறது. ‘இன்று புதிதாய்ப் பிறந்தோம்’ என்ற பாரதியின் வரிகள் நனவாகியிருக்கின்றன. நமது வாழ்க்கைமுறை, பொருளாதாரச் சூழல், ரசனைகள் என அனைத்தும் மாறியிருக்கின்றன. அலுவலகத்திலிருந்து அனைவரும் இணைந்து பணிபுரிந்துவந்த ஆனந்த விகடன் ஆசிரியர் குழு, இப்போது வீட்டில் இருந்தே பணிபுரிகிறோம். எங்கள் ஆசிரியர் குழு, நிருபர்கள், வடிவமைப்பாளர்கள் வீட்டில் இருந்தபடியும் வெளியில் செல்லும் புகைப்படக்கலைஞர்கள், விற்பனைப் பிரதிநிதிகள், விளம்பரப் பணியாளர்கள் அனைவரும் பாதுகாப்பு முறைகளையும் சமூக இடைவெளியையும் கடைப்பிடித்தும் இதழ் தயாரிப்புப் பணிகளில் ஈடுபட்டுவருகிறோம்.

மாற்றம் ஒன்றே மாறாதது. மாற்றத்துக்கு ஏற்ப தங்களைத் தகவமைத்துக் கொள்பவர்களே நிலைத்து நிற்பார்கள் என்பதை மனிதகுல வரலாறு நிரூபித்திருக்கிறது. கொரோனா அபாயம் நமக்கு உணர்த்தும் செய்தியும் அதுவே. நாம் அனைவரும் புதிய வாழ்க்கைச் சூழலை எதிர்கொள்ள நம்பிக்கையுடன் தயாராவோம். காலத்துக்கு ஏற்ப மாற்றங்களைச் செய்யும் ஆனந்த விகடன் இதழ்களில் நீங்கள் எதிர்பார்த்த மற்றும் எதிர்பாராத மாற்றங்களைக் காணப்போகிறீர்கள். உங்களுக்காகப் புதிய பகுதிகள், புதிய வடிவமைப்பு, புதிய உள்ளடக்கம் ஆகியவற்றைத் தொடர்ந்து வழங்கப்போகிறோம். உங்களின் எதிர்பார்ப்பை நிறைவுசெய்வதே எங்களின் பணி.

ஊரடங்கு அமலில் இருக்கும் மே 3 வரை வீட்டிலேயே தனித்திருங்கள்; விகடனோடு இணைந்திருங்கள்!

பா.சீனிவாசன்

ஆசிரியர்

ஆனந்த விகடன்

Must Read

இந்தி நடிகை திவ்யா சவுக்சே: புற்றுநோயால் உயிரிழப்பு

மத்திய பிரதேச மாநிலம் போபாலைச் சேர்ந்தவர் நடிகை திவ்யா சவுக்சே (28). நடிகையான பின்னர் மகாராஷ்டிர மாநிலம் மும்பையில் திவ்யா சவுக்சே வசித்து வந்தார். இவர் நடித்த முதல் திரைப்படம் ஹை அப்னா...

வாழ்த்துங்களேன்!

14.7.20 முதல் 27.7.20 வரை கீழ்க்காணும் இனிய வைபவங்களைக் கொண்டாடவிருக்கும் வாசகர்களுக்கு சக்தி விகடனின் வாழ்த்துகள்! அவர்களின் வாழ்வில் சகல வளங்களும் சந்தோஷமும் பொங்கிப் பெருகிடும் வகையில், திருக்கடவூர் அபிராமி அம்மை சமேத...

அனுராத புரத்தில் சில இடங்கள் லாக் டவுன் என அறிவிப்பு- மேலும் 14 பேருக்கு கொரோனா தொற்று

கந்தக்காடு புனர்வாழ்வு மையத்தில் கொரோனா தொற்றுடன் அடையாளம் காணப்பட்டவர்களுடன் தொடர்பில் இருந்தவர்களே தொற்றுடன் அடையாளம் காணப்பட்டுள்ளனர். இதன்மூலம் தொற்றாளர்களின் எண்ணிக்கை 2631 ஆக உயர்ந்துள்ளது. இதேவேளை 1981 பேர் குணமடைந்து வீடு திரும்பியுள்ளனர். 639...

முடக்கப்பட்டது பல்கலைக்கழகம் கிளிநொச்சி பல்கலைக்கழக மாணவிக்கு கொரோனா என அச்சம்

யாழ்ப்பாணப் பல்கலைக்கழகத்தின் தொழில்நுட்ப பீடத்தில் கல்வி பயிலும் மாணவி ஒருவருக்குக் கொரோனா தொற்று ஏற்பட்டிருக்கலாம் என்ற அச்சத்தின் அடிப்படையில், பல்கலைக்கழகத்தின் அனைத்துப்பகுதிகளும் சுகாதாரத் திணைக்களத்தினால் முடக்கப்பட்டிருக்கிறது. வளாகத்தினுள் இருந்து வெளியேறுவதற்கும், வளாகத்தினுள் செல்வதற்கும்...

அபூர்வ மீன்: மனிதனை போல் வரிசையாக பல், உதடு அனைத்தும்., வைரல் புகைப்படம்

சமூகவலைதளங்களில் வைரலாகி வரும் புகைப்படங்கள் பல நம்மை வியப்பில் ஆழ்த்தும் விதமாக இருக்கிறது என கூறலாம். இந்த நிலையில் மனிதனை போல் பற்கள், உதடுகள் கொண்ட அரிய வகை மீனின் புகைப்படம் சமூகவலைதளங்களில்...